الدنيا اوضة كبيرة للانتظار ..
فيها ابن ادم زية زى الحمار
الهم واحد .. .. والملل مشترك
ومفيش حمار بيحاول الانتحار
وعجبى !!! يا عينى عليك يا ابو الصلح
-
بستعجب انا على الانسان اللى ربنا كرمة وفضلة على باقى المخلوقات .. ومازال اقل من ... مش قادرة اقول والله، دايما بنتهم الشخص بطئ الفهم وسئ السلوك انة لا مؤاخذة حمار .. اى شخص مش مثقف وصوتى عالى ومتعجرف على طول نقول علية لا مؤاخذة حمار.. مع ان يا اخى الحمار ممكن تسيبة فى اى حتة يرجعلك ودة معناة انة مش غبى .. الرك على اللى بيتوه فى بلده، بالمقارنة لحياتنا وحياة الحمار .. هنلاقى اننا مبنتحركش ربع تحركاتة .. مبنتصرفش زى تصرفاتة .. مش عايشين يمأساة حياتة .. ومع ذلك هو فعال عن البشر .. هو عندة رسالة .. هدف .. عمل بيعملة طول اليوم وبيستحمل علشانة كل الصعاب .. كل دة علشان شوية برسيم فى اخر اليوم .. بياكلهم ويسكت .. لا بيفضل يلت ويعجن ولا بيلف ويدور حياتة فى منتهى الحكمة والصبر والذكاء والاهم من دة كلة الرضا .. اللى احنا مفتقدينة
الانسان : حيوان ناطق
دة تعريف الانسان فى اى معجم .. هو حيوان بس بينطق .. وياريتة ما نطق كل كلامة هم وغم وبلاوى وكل افكارة تدمير وحروب وظلم وقلة صبر .. للاسف بعد كل الدراسات اللى عملتها على الحمير بصفتى بحب الحيوانات وخاصة الحمير ( حب برئ والله ) بس لقيتهم بيفكروا اكتر من البشر واليكم الادلة
الحمار هرش التيتة عقبال عندك
الحمار هرش ازاى التيتة بقة ؟؟ اقولكوا ... هو عرف اللى فيها .. عرف ان الدنيا مفيهاش شئ يستاهل عرف ان حياتنا هتبقى بالعمل، والتفانى والاخلاص احلى وعرف كمان ان الرضا اول خطوات النجاح.. علشان كدة
متلاقيش حمار انتحر او فكر يهاجر برة البلد مع انهم اكتر مخلوقات بتتظلم
متلاقيش حمار اتجوز وفشل .. او حب وحبيبتة سابتة ..او سقط فى دراستة
متلاقيش حماراتجرح او جرح او خان او ظلم
متلاقيش حمار .. بعد ما اتخرج بقى عاطل .. علشان هو عرف المهم ان مفيش فى مصر تعليم فمفكرش فى الخطوة الجريئة دية اساسا
متلاقيش حمار بيخالف ضميرة وبيسرق ويغش ويزور
متلاقيش حمار يبص لك بقرف ويقولك فوت علينا بكرة مصالحك مش هنمشيها
متلاقيش حمار كلمتة وسخر من مشاعرك او فكرك وحسسك بالنقص وعدم الاحترام
متلاقيش حمار بيعمل فيديو كليب بملابس مش لابسة اساسا .. ولا حمار ماشى فى الشارع يعاكس بنات
ولا حمار بيموت ناس ومسئول عن ضحايا اطفال وشباب
لكن تلاقى بنى ادمين كتييييييييييير جدا كدة وبنرجع نشتم ونقول لاى حد فارسنا .. انت يا حمااااار ..
دة الحمار هرش التيتة اهو عقبالك زيك يا رااااااااااااجل ...
15 comments:
ههههههههههههههههههههههههههههههه
و اللهي انا صعب عليا الي احنا فيه بجد و بحبك يا حمار بقا :)
شفتى انة مخلوق لازم يتحب .. فعلا لازم يصعب عليكى حالنا .. وشكرا لردك الجميل
والله سعد الصغير ده مطرب تمام لانه قال وبحبك يا حمار قليلين قوى اللى بيقدرم قيمة الانسمار (اللى هو اى فرد من المخروصة) بصى يا مريومتى الانسان فى بعض الاحيان لازم يكون حمار مش بمعنى انه يبقا غبى لأ
المقصود انه يستحمل زى الحمار واللى يقولك يا حمار ده مش معناه تقليل قيمتك لا ده بيدربونا على كيفية التحمل لان الحمار معروف بقوة تحمله يعنى ضربة مفتاح انابيب ضربة كرباج مش هتفرق ان كانت فى معتقل ولا غيره المهم ان اللى هيعيش هنا وهو مش حمار هيهلك زى الفار
فعلاا كلامك مظبوط
دلوقتى كمان لما تشوفى واحد شغل جامد وخادم المكان اللى شغل فية تعليف طبيعى تقولى لية انت شغل حمار
اى بتاع شغل
اشكرك على البوست
تحياتى
اية يا يوسف الاحباط دة ؟
هيا كانت ناقصة يا ابنى
الواضح ان انا وكل اللى اعرفهم احباااااااااط
على رايك يا تامر .. بيقولو علية بالبلدى كدة .. حمار شغل
لنا الله والله
لا عاش ولا كان اللى يقولك يا حمار يا مريوم ده انت فاكهة الجروب بتاعنا
أنا طول عمري مش بحب ان حد يشتم حد يقوله ياحمار لأني فعلا كنت بشوف الحمار حيوان ذكي واحنا كده بنظلمه
البوست جميل (:
اللــه... فكرتيني بسعيد صالح لما كلم أبوه في مسرحية "العيال كبرت" و سأله استاذ رمضان ابو سره .. ابوه ضحك و قاله لألأ انا رمضان السكري رد سلطان و قاله" يا سيدي أهو كله برتقال" و الله انا حاسس ان الحمير لما بتشتم بعضها بيقولوا لبعض " روح يا جدع كده وانت انســــــــــان صحيح"
hi everybody hi ramty,u know how much i love these words they r My best display name :D .but iam not with all of u that sa3d el so3'ir is a good singer cause the donkey feels bad that he sang for it :S.with all my respect for the donkey but sa3d el so3'ir is just a bad singer :S:S and with all my respect for all of u i just reply for salah jahin :P:P:P
معاكي حق
الحمار حيوان حمول
على رايك يا درش اهو كلة برتقااااااااال
يا سارة يا حبيبتى محدش بيحب سعد الصغير ولا الاغنية بس بحب الحمار ولا مش من حقى احبة ؟؟
ما تسيبونى احب عايزة احب الله
والله عندك حق يا بنتى
هقول ايه؟
no comment
لا باحب سعد الحمار ولا باحب الحمار
ان انكر الاصوات لصوت الحمير
تحياتي
Post a Comment