دة كلام انا لقيتة فى الدستــــــــــور وانا بقرأها كعادتى كل اربعاء
مش عارفة اصنفة .. شعر ولا نثر ولا رثاء .. ولا اية بالظبط
بس اللى اعرفة انى حسيتة اوووى .. حسيت ان احنا دول
كل الشباب دول .. كلنا واحد
الكاتب اسمة : شادى زلط .. مش عارفة هو الاصل ولا واخدها من حد بردو
اظن بعد كدة محدش يقول انى احباط .. انا منبع الامل اهو
احنــــــــــــــا الشبــــــــــــــاب
احنا الشباب اللى احترفنا القاعدة جنب الرصييف
احنا الشباب اللى فى ربيع العمر قاعدين بنستنى الخريف
احنا القميص اللى طالع عينة لبس ولسة متهراش
والبنطلون الجينز اللى ملبوس من سنة وما اشتكاش
هو اشتكى .. .. .. بس احنا مسمعناش
والكوتشى العزيز اللى نعلة من المشى باش
احنا الشباب اللى شال احلامة البسيطة على ضهرة فى الشنطة القماش
احنا اللى قعدنا على القهاوى قبل ما نتحال معاش
اللى الزمان ادانا فوق راسنا كتير وشكلة لسة مكتفاش
احنا اللى قضينا شبابنا خوف وصبر وذهول واندهاش
احنا اللى بندور على حتة نقف فيها فى اتوبيس الحياة
التاكسى لأأ
التاكسى دة حاجة يركبها اللى معاة
اسألنا احنا .. أسألنا
ما تسألش اللى بتضايقة وقفة فى الاشارة
اسأل اللى ياما كعبلتهم خطوط عبور المشاة
احنا اللى خللنا فى الكلية واما طلعنا قعدنا فى البيت كالحريم
وكل يوم نسمع عن ( تلتميت الف ) فرصة عمل نهلل فلتحيا الحكومة وليحيا الزعيم
ونبات الليل بنحلم بالشغل وفلوسة والبيت والنعيم
ونروح نلاقى كوساية واقفة وبتطلع لسانها وتقول ... يا غشيم
احنا شباب الميسد والرنة الخفيفة
احنا شباب رغم الهباب عايشين على دماغنا النضيفة
غلو السجاير ... طب واحنا مالنا .. فلتحيا الكوكو سيجارتنا الضعيفة
احنا اللى بالنهار بنعس على القرش وندوخ وراة ولما الليل يليل تجمعنا قعدتنا اللطيفة
احنا اللى بندوحر مع الدنيا واخدينها عافية وبالدراع برغم اجسادنا النحيفة
احنا اللى لسة بنحب البلد دية برغم مقالبها السخيفة
احنا اللى رغم ثورتنا ما تسعدناش حاجة قد الكلمة اللطيفة
احنا شباب اللى ساعات بنقدر نقف فى الطابور رغم شلاليت الدنيا العنيفة
احنا اللى لفينا البلد شبر شبر رغم الزحام
احنا اللى خلصنا الدموع وخلصنا الكلام
بس لسة مخلصناش الضحك والتريقة والابتسام
مش عايزين غير اوضة باربع جدران .. وشباك وباب
ولمبة نقرا عليها المكتوب فى الكتاب
وعنوان نكتبة فوق ضهر الجواب
عنوانا احنـــا
احنــــــــا الشباب
19 comments:
ربنا يهدى الحال ويصلح حال البلد
بس حبيت اقول ان احنا الشباب اللى شعرنا شاب قبل مانكبر احنا الشباب اللى عقلنا غاب من كتر ما بنخسر
لا اله الا الله؟؟؟ ليه بس كده يا جدعان؟ والله زعلتوني علي الشباب لامؤاخذه يا جماعه بس احنا لو لمينا الشباب دي كلها و رحنا بيهم ممكن نعمل ثوره أو نفتح قهوة و نقسمه مجاميع و كل مجموعه مكونه من 4 أفراد و نلعب أحلي بولة استيمشن اضحكوا اضحكوا يامحلا الضحكة اللي من وسط دموعناهاربه
يخرب بيت عقل اللى كاتبها
تحفة موووووت
ايه ده انتي رائعه لا اكتر من رائعه
حلوه جدا
كتنا نيله فحظنا الهباب
أنا كنت قرأتها في الدستور, وهي فعلا جميله جدا, وجميل انك تنشريها هنا عشان اللي مشتراش الجرنان يقرأها.
راما ، انا عايزة اصفق كتيييييييييييير اوي للي كاتبها وارفعلو القبعة تحية للبساطة الكلمات وجمال المعنى
ربنا يخليكي ليا يا راما يا محساساني بالتفائل دائما :)
كلام قادم ومعبر عن واقع يعيش فية اغلبية الشباب
تحياتى
والله يا درش .. الاستيميشن اجدع دلوقتى
يا طمطم يا حبيبتى انا طول عمرى متفائله
شكرا يا تامر على ردك
ميمو
ربنا يخليكى بس اللى كاتبها فعلا رائع
اسراء
فعلا فكرت انزل حاجات معينة من الدستور علشان اللى مبيلحقش يشتريها
ليه كده بس فكرتينا يا شيخة
لازك كده تقوليها في وشنا
ما احنا عارفين .... اقصد حاسين
فاكرين مسرحيه محمد صبحي بتاعت ماما امريكا ؟؟؟
احنا مقبلين علي ايام سوداا
وان كانت دي سودا فالي جاي اسود
رينا يست
كله يقول كل سنه وانتى طيبه لراما حبيبة قلب الناس كلها عشان فاضل يومين على عيد ميلادها
بتحرجنى يا يوسف والله بزوقك .. كويس انك فاكر عيد ميلادى
فعلا كلام المقالة دي هايل
مش انتي لوحد اللي محبط ولا زلط لوحده محبط حال الدنيا كده ربنا يهدي يارب امين لاكن برده مصر مش وحشه حال مصر اللي وحش ربنا يصحه من عنده
يا مية ندامه على الشباب اللى واقف بيتفرج على جارحو وهو بينزف ومش عارف يداويه........
و اللة يابنتى يمكن النهاردة مش يتاعنا لكن بكرة أكيد بتاعنا
دى لازم تلمسنا كلنا
من الجميل اوى انك تلاقى حد يعبر عنك وتقرا كلام كأنك بتشوف نفسك بالضبط
جميلة اوى يا راما
احنا الشباب
طيب ده الرجل عنده
حق فى كل اللى قاله
بس بجد جميلة جدا
ربنا يعينا على اللى احنا فيه
ويعينا على اللى بنشوفه
تحياتى لكى
جميلة جدا بجد بس معبرة اوووووووووووى
طب حتى اضحكوا علينا
خلونا نتخدع ولو مرة اهو نصبر نفسنا باى كلام
ما تصدموناش بالواقع مرة واحدة
يمكن بكرة يبقى احسن
يمكن...ما فيش شئ بعيد
Post a Comment