انا بعد غياااااااب لا اعلم مبرره

بجد مش عارفه انا كنت فين ومكنتش بكتب ليه .. جالى عطل فنى وشلل فكرى عجيب اووى

ما علينا المهم انى جيت بالسلامه الحمد لله والشكر لله

واللى استفزنى اكتب تانى انى شفت مقال لواحده صاحبتى اسمها مى عن فيلم عمروسلمى

هيا معترضه على الفيلم

انا وعلى غير العاده عاجبنى الفيلم مموووووووووووت جدا جدا جدا

انتظروووووونى ان شالله هاقولكو على الاسباب الجوهريه

اللولبيه اللى خلتنى ااقول كده

مريم

أمسية نكدية .. أنا والسقف وهواك

أوقات كتير ضيعتهم على ناس كتير عرفتهم

بس العبث انى خلاص معرفهمش دلوقتى

وحاجات كتير فهمتهم... لو قلتهم

هيبقى تضيع للشوية الصغنتتين اللى فاضلين من وقتى

قريت الكلمتين دول فى الدستور من هنا .. وحسيت انى سافرت وسرحت كدة وبصيت للسقف زى ما يكون هيغششنى مثلا

بس مبصتش على السقف وسرحانة علشان فى حالة حب لا سمح الله وبستمد من السقف العون زى افلام زمان

بصيت علشان اعد كام مرة عرفت ناس وسبتهم ؟؟

كام مرة عرفت حد وحبيتة وفى الاخر دلوقتى معرفش حتى ساكن فين ؟؟

كام مرة كان ليا صحاب حلوين اوى وسيبنا بعض ؟؟ سيبنا بعض مش علشان هما مش كويسين ولا علشان انا غبية

وبكرة صحابى او باكلهم زى مليجى اخو اوشه لا علشان هيا دية الحياة

كام حاجة فهمتها وصدمتنى ؟

وكام حاجة ندمت انى فهمتها وكان نفسى ابقى عبيطة ؟

فضلت سرحانة كتير بفكر فى وقت ضيعتة ومحستش بية .. وفرص راحت منى مش عارفة اعوضها

فقت على صوت الحاج مدحت صالح الله يكرمة زى ما يكون كان متسلط عليا مثلا ومعرفش مين المؤذى اللى شغلة

واكيد حد من المجاريح جيرانى .. اصلنا شارع رومانسى وعاطفى شوية

اهو مدحت بية باشا صالح كان بيقول بقة اية

اقفل على قلبك كفايا تجرحة

وتعلقة بحبال امانى تطوحة

من النهاردة الحلم مش هيفرحة

ارجووووووووووك متحلمشى

كنت هاصوت ساعتها واقول ارجوووووووووووكم اقفلو الكاسيت .. وفجأة لقيت نفسى بسرح تانى وبنتقل لمكان تانى بالذاكرة

بفكر وبقول .. ياترى كام مرة حلمت ولما حلمت حققت ولا لا ؟؟

رجعت بالذاكرة 15 سنة لورا .. لما دخلت المدرسة كنت طفلة فى منتهى الرخامة .. عندية جدا وعصبية جدا وشقية جدا

بس كنت ذكية ودمى خفيف والفترة دية مكانش ليا احلام علشان كنت بحقق كل اللى نفسى فية قبل ما احلمة

ولما كبرت وبقيت فى الابتدائية حلمت ادخل كلية هندسة ومش اى قسم لا مدنى كمان واتصدمت باول حقيقة وهيا ان مفيش هندسة

بنات فى الازهر .. المهم دخلت علمى وذاكرت وجبت اللهم لا ار ولا حسد 95 % فى الثانوية الازهرية وكانت وقتها الهندسة فتحت

للبنات .. بس للحظ السعيد خدت من 95.2 % دة بمناسبة انى فقر حبتين ودخلت ترجمة فورية رغم انى مبحبهاش الا انى تقبلتها

وهيا بمثابة الكابوس .. حاولت احولة لحلم جميل .. وبردو لحد دلوقتى معرفتش

ابتداء من 3 ثانوى بدأت افهم واحس يعنى اية حلم .. ويعنى اية ميتحققش ؟ ويعنى اية انك تصحى من حلمك على كابوس

وسالت نفسى سؤال مهم اوووى ... هو انا كنت بحلم علشان احقق الحلم ولا علشان اهرب من الواقع ؟؟

ملقتش اجابة غير انى ابص حواليا اقرأ اى حاجة علشان اخرج من موود السرحان بقة وشغل الحبيبة اللى يشل دة .. المهم بصيت جنبى لقيت كشكول محاضرات .. قلت اهو الفرج جة اهو .. اذاكرلى كلمتين

بفتح لقيت فى اول صفحة عمنا صلاح جاهين .. وزى ما يكون اتفق مع الحاج مدحت صالح والمعلم خالد كساب بتاع الدستور علشان

يعملولى احلى امسية نكد عشتها فى تاريخ حياتى ... وفجأة ومن غير اى مقدمات لقيت كلام صلاح جاهين بخطى فى كشكولى بيقول

ياما صادفت ناس ومصاحبتهمش

وكاسات خمور وشراب ومشربتهمش

اندم على الفرص اللى سبتهم ولا اللى مسبتهمش

الله الله الله .. دخلنى عم جاهيين على منطقة تالتة خالص وسرحت فيها .. وكل مرة بسرح بيكون البطل هو السقف .. انا الحاجة المشتركة

انا والسقف بنتكرر مع كل سرحة من السرحات اللى بسرحهم

المرة دية بقة مفكرتش فى كاسات الخمور والشراب ولا الكابتشينو علشان مبحبوش ولا الحاجات دية كلها

لا .. فكرت فى حياتى كمجمل .. فى اية اندم علية ؟؟ وفى اية مندمش علية

طيب لو ندمت اندم لية ؟؟ ولو مندمتش ابقى مبحسش ولا اية ؟ ولو فكرت ابقى بتعب نفسى ولو كبرت ابقى سلبية وبضيع نفسى

طيب هو انا عايزة اية ؟؟ ومش عايزة حاجة لية ؟؟

صلاح جاهين عايز منى اية .. والجيران فتحوا الاغنية دية لية ؟؟ وياترى اللى فاتحها فاتحها علشان بتلمس جواة حاجة

ولا فاتحها نوع من انواع الغلاسة او انة عايز يسمع فيرجينيا جارتة اللى بيحبها انة بيسمع اغانى وواد كوول

وخالد كساب هو كمان كتب كدة فى المقال لية ؟؟ مش عارف ان فى ناس معقدين دماغهم مبتسكتش هيقروا الدستور

انا اية اللى خلانى اشترى الدستور؟؟ اية الى خلانى اعرف الجيران اساسا

واية اللى خلانى افتح كشكول المحاضرات .. او اية الى خلانى اكتب الرباعية دية فية زمان

وعلشان اخرج من كل الاوهام دية كلها .. وعلشان اريح دماغى اللى تعبت من التفكير قررت ان دية تكون اخر طلعة سرحان اسرحها اليوم دة ففكرت فى حل هايل

قمت طفيت النور .. ونممممممممت

ومعرفش انا نمت علشان احلم .. ولا علشان اهرب من الحلم .. ولا لية بالظبط

بس الحمد لله صحيت فاكرة كل كلمة وعلى غير العادة .. فقررت اسجل اللحظة دية علشان مش هنساها

لا تحسدوا تلك المراة .. او احسدوها مفيش مشاكل

هل المرأة الجميلة المثقفة .. المستقلة ماديا .. الناجحة علميا والتى تجذب بذكاء شخصيتها وعمق حديثها القلوب

والعقول فتهفو حولها .. سعيدة ؟؟

هل المرأة التى نشأت فتاة متمردة لها شخصية مستقلة ترفض التقليد وترفض ان تسمعالراى فتتبعة وتؤمن بالراى

فتتبعة ولو اغضب

الجميع .. سعيدة؟؟

هل المرأة التى تزهو بذكاءها وشخصيتها اكثر مما تزهو بجمالها .. ورقتها .. سعيدة ؟؟ هل المرأة التى تصبح اينما

توجهت قبلة الانظار

ومحل القبول والرفض .. سعيد ة؟؟

البعض يرفعها الى مقام عال من الخلق والرصانة والفهم .. والبعض ينزل بها الى مرتبة التمرد الذى يقترب من الجنون

هل هى سعيدة كافأتها السماء بصفات تحلم بها اغلب النساء ...ام انزلت عليها عقابها بان جعلتها ذات طابع منفرد

وغريب ؟؟

لا تحسدوا تلك المرأة فهى تعيش ازمة نفسية وعاطفية مستعصية ..فمن الصعب ان تجد بين االرجال من يبهرها

بشخصيتة ويغريها على

السكون الى جوارة بعمق ونضج عاطفتة .. لتعطية اثمن ما تملك وهو ( قلبها ) وتحتفظ بالاثمن (عقلها ) م

من الصعب ان يسترضيها احد .. او يرغمها احد على فعل ما تفعلة غيرها من النساء بكامل الرضا

فهل بعد كل هذا هى سعيدة ام تعيسة ؟؟

تحسدوها بقة ولا تشفقوا عليها ؟؟

حتى انت يا صديقى ... كن صديقى

جلست اتجاذب اطراف الحديث مع اعز اصدقائى واقربهم الى قلبى يسود حديثنا جو من العاطفة الهادئة التى تولدها مشاعر الصداقة .. ويالها من مشاعر احتاجها بشدة حيث كثرت الامى النفسية واحتاج من يشاركنى بها ...

نظر الى صديقى وقال : ماذا تخفية فى حنايا قلبك يجعلك حزينة الى هذا الحد ؟ اشركينى معك وحدى اعلم ما بداخلك

اخبرنى يا صديقى ماذا افعل ؟؟ فلقد اخبرتة ان لا يقترب منى لانى اخاف علية .. اخبرتة الا يتعود على وجودى فى حياتة ان لا يغمض عينية على صورتى فى خيالة ولا على صوتى فى اذنية ولا على كلماتى وصمتى فى قلبة ..اخبرتة الا يقترب منى حتى تكون لحياتة معنى وهو بعيد عنى .. حتى لا يربط وجودة وعملة وساعاتة ودقائقة على خطواتى فانا اخاف علية

اخاف الا يبحث عن الدفء والامان ا لا عندى وانا لا اريد له ذلك ..اخاف من تغلغى فى حياتة اكثر من هذا فانا اعرف تماما كيف يتغلغل انسان فى حياة اخر فيكون دون قصد مصدر لتعاستة بدل من هناؤة ..

لا اريد له ان يتعذب بى .. ولا ان يهفو قلبة فقط لى .. لا اريد لنبضاتة ان تسرع وانا اتحدث الية .. اريدة ان يفوق منى وان ينفض مشاعرة الوليدة تجاهى قبل ان تتوحش ولا يمكنة السيطرة عليها .

اه لو يصدقنى ..لو يشعر بصدق خوفى علية .. انا لست شريرة تخاف من نفسها وتاثيرها علية ..ولكن انسانة بها قدر من الحساسية تخاف على انسان تعتز بة وتعرف تماما ان غدهما لن يكن ابدا واحدا

..لا اريد له ان يقترب منى الى حد الذوبان والتلاشى يحركة احتياجة النفسى .. ولا ذلك التوافق بينناولا ذلك التشابة بين شخصياتنا ..

صديقى : احقا لا تحتاجين بجوارك حبيب يشعرك بانك الملكة المتوجة على عرش قلبة .؟؟هذا حلم كل فتاة فماذا عنك ؟؟

نعم .. احتاج .. وافتقد اهتمام حبيب ( معين ) بى كانسان امثل بالنسبة له كيان خاص يهتم بةويقدرة دونا عن بقية سكان الكرة الارضية ..ولكنى فى الوقت الحالى لست بحاجة الى حبيب بقدر حاجتى الى صديق عميق ارتاح لوجودة فى حياتىصديق يسمعنى اذا احتجت ان ابوح عما بداخلى لاحد .. يمسح دموعى عندما تشرق بها نفسى واداريها عن

الجميع ولا يراها غيرة ..احتاج لتلك العاطفة الهادئة التى تولدها الصداقةانا الان بين يديك يا صديقى فقل لى ما الحل ؟؟

ماذا افعل معة ؟؟ فقد صارحتة ولا يزال على موقفة ما هذا ؟؟

اخالك مليت حديثى .. اصحيح ما اشعر ؟؟

ما هذا .. مالى ارى الدموع وقد ترقرقت فى عينيك ؟؟

مالى ارى احتباس دمعك بمقلتيك ؟؟

ماهذا الاحمرار الشديد الذى علا وجنتيك ؟؟

اعتدنا الصراحة معا فلما لا تصارحنى .. اهناك ما يغضب فى حديثى .. ؟؟

ماهذة الكلمة التى تفوهت بها ؟ لا اسمع جيدا ؟لماذا يخفت صوتك هكذا ؟

لم اعتاد منك على هذا الخجل قل ما تريد البوح به وان جرحتنى بكلمك .. تكلم ..

صديقى : احبـــــــــــــــــــك

الا انت يا صديقى .. ارجوك اعتدت ان اخسر من يقولها ..تراجع عنها لا اريد سماعها منك

صديقى : بل انا احبــــــــــــــــك

انت وحدك تعلم ما بى .. لك وحدك اشكو ما بداخلى .. تعلم ما فى نفسى قبل ان اعلمة

صديقى : انا من تبحثين عنة .. احبـــــــــــــــــك

وانا احتاجك صديقى .. انت فقط صديقى .. ارجوك ... كن صديقى

دة الحمار هرش التيتة يا معلم

الدنيا اوضة كبيرة للانتظار ..
فيها ابن ادم زية زى الحمار
الهم واحد .. .. والملل مشترك
ومفيش حمار بيحاول الانتحار
وعجبى !!! يا عينى عليك يا ابو الصلح
-

بستعجب انا على الانسان اللى ربنا كرمة وفضلة على باقى المخلوقات .. ومازال اقل من ... مش قادرة اقول والله، دايما بنتهم الشخص بطئ الفهم وسئ السلوك انة لا مؤاخذة حمار .. اى شخص مش مثقف وصوتى عالى ومتعجرف على طول نقول علية لا مؤاخذة حمار.. مع ان يا اخى الحمار ممكن تسيبة فى اى حتة يرجعلك ودة معناة انة مش غبى .. الرك على اللى بيتوه فى بلده، بالمقارنة لحياتنا وحياة الحمار .. هنلاقى اننا مبنتحركش ربع تحركاتة .. مبنتصرفش زى تصرفاتة .. مش عايشين يمأساة حياتة .. ومع ذلك هو فعال عن البشر .. هو عندة رسالة .. هدف .. عمل بيعملة طول اليوم وبيستحمل علشانة كل الصعاب .. كل دة علشان شوية برسيم فى اخر اليوم .. بياكلهم ويسكت .. لا بيفضل يلت ويعجن ولا بيلف ويدور حياتة فى منتهى الحكمة والصبر والذكاء والاهم من دة كلة الرضا .. اللى احنا مفتقدينة

الانسان : حيوان ناطق

دة تعريف الانسان فى اى معجم .. هو حيوان بس بينطق .. وياريتة ما نطق كل كلامة هم وغم وبلاوى وكل افكارة تدمير وحروب وظلم وقلة صبر .. للاسف بعد كل الدراسات اللى عملتها على الحمير بصفتى بحب الحيوانات وخاصة الحمير ( حب برئ والله ) بس لقيتهم بيفكروا اكتر من البشر واليكم الادلة

الحمار هرش التيتة عقبال عندك

الحمار هرش ازاى التيتة بقة ؟؟ اقولكوا ... هو عرف اللى فيها .. عرف ان الدنيا مفيهاش شئ يستاهل عرف ان حياتنا هتبقى بالعمل، والتفانى والاخلاص احلى وعرف كمان ان الرضا اول خطوات النجاح.. علشان كدة

متلاقيش حمار انتحر او فكر يهاجر برة البلد مع انهم اكتر مخلوقات بتتظلم
متلاقيش حمار اتجوز وفشل .. او حب وحبيبتة سابتة ..او سقط فى دراستة
متلاقيش حماراتجرح او جرح او خان او ظلم
متلاقيش حمار .. بعد ما اتخرج بقى عاطل .. علشان هو عرف المهم ان مفيش فى مصر تعليم فمفكرش فى الخطوة الجريئة دية اساسا
متلاقيش حمار بيخالف ضميرة وبيسرق ويغش ويزور
متلاقيش حمار يبص لك بقرف ويقولك فوت علينا بكرة مصالحك مش هنمشيها
متلاقيش حمار كلمتة وسخر من مشاعرك او فكرك وحسسك بالنقص وعدم الاحترام
متلاقيش حمار بيعمل فيديو كليب بملابس مش لابسة اساسا .. ولا حمار ماشى فى الشارع يعاكس بنات
ولا حمار بيموت ناس ومسئول عن ضحايا اطفال وشباب

لكن تلاقى بنى ادمين كتييييييييييير جدا كدة وبنرجع نشتم ونقول لاى حد فارسنا .. انت يا حمااااار ..
دة الحمار هرش التيتة اهو عقبالك زيك يا رااااااااااااجل ...

احنـــا الشبــــاب

دة كلام انا لقيتة فى الدستــــــــــور وانا بقرأها كعادتى كل اربعاء

مش عارفة اصنفة .. شعر ولا نثر ولا رثاء .. ولا اية بالظبط

بس اللى اعرفة انى حسيتة اوووى .. حسيت ان احنا دول

كل الشباب دول .. كلنا واحد

الكاتب اسمة : شادى زلط .. مش عارفة هو الاصل ولا واخدها من حد بردو

اظن بعد كدة محدش يقول انى احباط .. انا منبع الامل اهو

احنــــــــــــــا الشبــــــــــــــاب

احنا الشباب اللى احترفنا القاعدة جنب الرصييف

احنا الشباب اللى فى ربيع العمر قاعدين بنستنى الخريف

احنا القميص اللى طالع عينة لبس ولسة متهراش

والبنطلون الجينز اللى ملبوس من سنة وما اشتكاش

هو اشتكى .. .. .. بس احنا مسمعناش

والكوتشى العزيز اللى نعلة من المشى باش

احنا الشباب اللى شال احلامة البسيطة على ضهرة فى الشنطة القماش

احنا اللى قعدنا على القهاوى قبل ما نتحال معاش

اللى الزمان ادانا فوق راسنا كتير وشكلة لسة مكتفاش

احنا اللى قضينا شبابنا خوف وصبر وذهول واندهاش

احنا اللى بندور على حتة نقف فيها فى اتوبيس الحياة

التاكسى لأأ

التاكسى دة حاجة يركبها اللى معاة

اسألنا احنا .. أسألنا

ما تسألش اللى بتضايقة وقفة فى الاشارة

اسأل اللى ياما كعبلتهم خطوط عبور المشاة

احنا اللى خللنا فى الكلية واما طلعنا قعدنا فى البيت كالحريم

وكل يوم نسمع عن ( تلتميت الف ) فرصة عمل نهلل فلتحيا الحكومة وليحيا الزعيم

ونبات الليل بنحلم بالشغل وفلوسة والبيت والنعيم

ونروح نلاقى كوساية واقفة وبتطلع لسانها وتقول ... يا غشيم

احنا شباب الميسد والرنة الخفيفة

احنا شباب رغم الهباب عايشين على دماغنا النضيفة

غلو السجاير ... طب واحنا مالنا .. فلتحيا الكوكو سيجارتنا الضعيفة

احنا اللى بالنهار بنعس على القرش وندوخ وراة ولما الليل يليل تجمعنا قعدتنا اللطيفة

احنا اللى بندوحر مع الدنيا واخدينها عافية وبالدراع برغم اجسادنا النحيفة

احنا اللى لسة بنحب البلد دية برغم مقالبها السخيفة

احنا اللى رغم ثورتنا ما تسعدناش حاجة قد الكلمة اللطيفة

احنا شباب اللى ساعات بنقدر نقف فى الطابور رغم شلاليت الدنيا العنيفة

احنا اللى لفينا البلد شبر شبر رغم الزحام

احنا اللى خلصنا الدموع وخلصنا الكلام

بس لسة مخلصناش الضحك والتريقة والابتسام

مش عايزين غير اوضة باربع جدران .. وشباك وباب

ولمبة نقرا عليها المكتوب فى الكتاب

وعنوان نكتبة فوق ضهر الجواب

عنوانا احنـــا

احنــــــــا الشباب

احمـــــدى ربنــــــا

انا قلبى كان شخشيخة اصبح جرس

جلجلت بة صحيوا الخدم والحرس

انا المهرج .. قمتوا لية خفتوا لية

لا ف ايدى سيف ولا تحت منى فرس

وعجبى !!!!

حصل حاجة كدة كنت عايزة اخد رايكو فيها .. مش هطول فى الكلام، ضافنى ايميل واحد كدة غريب وانا كعادتى اللى عارفة انها ربما تكون غلط بوافق على الاضافة لاى حد مؤقتا طبعا لحد ما اعرف عدو ولا حبيب..او بمعنى اصح اعرف هو تبع اية . ضافنى منين ليكون حد مهم ولانى بنسى اسماء الايميلات فلازم اوافق على الاضافة قبل ما ابلك حد او ادلتة المهم ..

-

ضفتلكوا الاخ دة وبدون داعى لذكر الاسماء.. لقيتة بيتكلم بلهجة ناشفة شوية.. قالى انا قريت البلوج بتاعتك .. اتنفشت انا واتنفخت وبقيت شبة عجينة الكيزر .. مدامتش فرحتى والله لقيت الراجل اتحول والنور اللى فى وشة اطفى (على راى عادل امام ) وقالى بلهجة قاسية شوية انتى عايزة اية ؟؟؟ انا احترت وبسرعة كدة راجعت الكلام اللى دار ليكون انا قلتلة حاجة ولا بوحت له مثلا بمشاعر حب ولا حاجة
-

قلتله : يعنى اية ؟؟
قالى : انتو عايزين اية من البلد .. بتعملو كدة لية ؟؟
قلتلة : اهدى بس هما مين دول ؟ ولوهلة كدة حسيت انة طلب الرقم غلط
قالى : انتى وباقى البلوجرز .. يكون فى علمك مباحث النت مش نايمة واحنا عارفين كل واحد وباسمة
قلتلة : وهو احنا قلبنا نظام الحكم ولا قلنا حاجة عيب لا سمح الله
قالى : انتى بنت وحرام تبهدلى نفسك .. انتى متعرفيش اللى بيحصل فى المعتقلات
قلتلة : وفى محاولة فاشلة منى انى اضحكة او اخرجة من مود السجن دة .. بلاش شغل فيلم الكرنك دة
قالى : افهم من كدة انة مش هامك وقلبك جامد .. طيب استقبلى منى دول
-
بينى وبينكم استقبلت نوع من انواع الفضول اللى بعترف انة عيب خلقى خطيييير فيا... لقيت اية بقة فيديوهات من اللى بيحصل فى المعتقلات وبلاوى زرقا .. مستحملتش وغباءى انى مسحتهم .. وطبعا اعصابى تعبت بس البركة فى زميل ليا عزيز فى مجال البلوجرز حاول يهدينى .. بس كان مخنوق منى جدا علشان انا مسحت الفيديوهات .. بس رد فعل تلقاءى منى مسحتهم
-
حاولت اتظاهر قدام الراجل اللى ضافنى انى مشفتش الفيديو علشان انهى المناقشة بس هو علق وقالى لو خايفة على اهلك واصحابك وزمايلك البلوجرز حاولى تفهميهم وتبعديهم .. واحمدى ربنا انك لقيتى واحد زيى ينصحك ويحاول يبعدك عن المواضيع دية ... قلتلة اه فعلا الحمد لله وفورا .. نهيت المناقشة
-
وبعد ما بلكتة ودلتة واتناقشت مرارا وتكرارا فى الموضوع دة .. اقتنعت انى انشرة .. من باب انى بنصحكوا او باخد رايكم .. مش هتفرق كتير .. يعنى اية اللى ممكن يتقال فى موقف زى دة ؟؟