اقلع غماك يا تور وارفض تلف
اكسر تروس الساقية .. اشتم وتف
قال : بس خطوة كمان وخطوة كمان
يا اوصل نهاية السكة .. يالبير يجف
وعجبى !!!!!!
-
أنا اسفة طبعا لاستخدام المصطلح دة بس للاسف هو دة اللى بجد لايق علينا .. انا مع اول ايام العيد مكنتش عايزة ابقى مصدر نكد على الناس بس للاسف دة اللى هضطر اعملة .. مش هاجيب سيرة صدام .. ولا هاقول اية اللى حصل دة ولا حصل لية ولا اية رايكم .. هاقولكم حاجة واحدة بس . اكيد بعد ما قفلنا التليفزيون بعد مشاهدة المشهد المؤلم دة كل واحد فينا حس بحاجة .. اقولكوا احساسى غير انى طبعا حسيت انى مات جوايا احساسى بالدهشة وبالاستغراب..
-
انا حسيت بجردل مية ساقع فى عز البرد دة وانا اتحطيت فية .. يا ريتة اتدلق عليا بس وسمعت صوت جاى من بعيد بيقولى بلهجة متحدية اووووى .. انتهى الدرس يا اهبل .. او يا هبلة .. قومى بقة علشان مش طالبة غباء وطبعا فهمت الدرس اووى
-
مسرحية محمد صبحى العبقرى ( انتهى الدرس يا غبى ) من اعظم الاعمال اللى ممكن نحسها ونفهمها .. نضحك عليها ونتجاهل اى معنى فيها .. لكن الوضع معايا مختلف..انا مش بكلمكم عن الفن فى ظل الكارثة اللى العرب فيها ..لا انا بس بالصدفة كنت بتفرج على المسرحية دية امبارح .. قبل ما اشاهد الكارثة الصبح
-
محمد صبحى يا سادة قدر يوصف اللى حصل النهاردة فى مسرحية من 30 سنة .. مع انة ساعتها لا كان فى صدام ولا حاجة من الاهانات المتتالبة دية قال سطوحى اللى هو محمد صبحى فى المسرحية ان مشكلة العالم مش فى الذكاء والغباء ..مشكلة العالم انة محتاج قلب . مش عقل من الاخر يعنى مشكلة الانسانية انها محتاجة انسانية .. ومعتقدش من الانسانية فى شئ اللى حصل وبيحصل وهيحصل
-
قال كمان كلمة بعتبرها دستور لازم كلنا نمشى علية . قال اذا كان اللى بينضرب على قفاة عقلة بيضلم وذكاءة بيقل فدية حلها الوحيد ..
اننا كلنا نرفض اننا ننضرب على قفانا .. ودة اللى محصلش احنا اخدنا حتة قفا الصبح .. كلنا كلنا على قفانا .. متزعلوش والله دة اللى حصل .. ضربوا بمشاعرنا عرض الحائط لاننا من البداية سمحنالهم يضربونا على قفانا فيبقى مش من حقنا نثور ولا نزعل ولا نتظلم
-
مش من حقنا غير نحزن ونكتم حزننا .. انا مش لاقية كلام اقولة .. مش لاقية غير حسبى الله ونعم الوكيل مش علشان اتهانا ولا اتبهدلنا ولا خدنا على قفانا .. لكن علشان انتهى الدرس يا اهبل وانت لسة بتتفرج ... لسة مرفضتش تتضرب على قفاك .. لسة موصلكش الهدف من اى معارضة بتتقدملك ...صدقونى انا مقصدش حد معين بكلامى من الاخر مفيش بينى وبين حد طار .. لا بتكلم على حكومة بس ولا معارضة بس انا بتكلم على العــــــــرب بوجة عام .. ولفظ اهبل دة استخدمتة مع ان المسرحية مستخدمة غبى لان فى فرق .. الغبى بيفهم متاخر .. الاهبل للاسف مبيفهمش او مش عايز يفهم ودة هو الهبل بعينة .
-
انا مش زعلانة على صدام بشكل شخصى او لذاتة لانى معرفهوش .. او موصلتش فى السياسة للمرحلة اللى بيها احكم على صدام مخطأ ولا لا .. وعلشان دة مش موضوعنا .. كل اللى زعلانة علية الاهانة والاستهتار اللى اتوجهوا للعرب والمسلمين فى شخص صدام ... لحد امتى ؟؟؟؟ لحد امتى جاوبونى انا تعبت محدش ينكر ان المشاهد اللى كلنا شفناها اثرت فينا .. انا حاولت التماسك قدام العائلة . لكن جوايا شرخ كبير اوى صعب يتداوى ..
-
انا اسفة نكدت عليكو .. بس دة على اعتبار انكو اصلا متنكدتوش من زمااااااااااان انا متكدرة جدا جدا جدا وللاسف المرة دية مش عارفة اقول اهو كلة برتقال لانة اختلف دلوقتى وبقى قرع.
10 comments:
يا استاذه مريم مبدايا احب اقول لسياتك ان صدام كشخص يستحق يتعدم الف مره للاعمال المشينه لتاريخ البشريه اللى عملها لكن انا بضم صوتى لصوتك ف موضوع الاستهانه والكل لازم يعرف انو كاس وداير وللى احنا بنشفهم بيموتو انهاردا على شاشات التلفزيون ونعد نقول يا حرام وياعينى وبعد شويه نقلب القناه ونتفرج على حاجه تانيه بكره هايجى الدور علينا وسعتها ياترى هيبقى لسه فاضل حد يتفرج علينا ويقول يا حرام ولا لا
مريم
دي رسالة وواضحة اوي
يا عرب رئيسكم المفدى اللي عذبكم وبهدلكم سنين دبحناه على العيد
فهمتوا يا معيز ؟؟
طبعا المعيز دول هو الشعوب العربية
ياااااااه يا مريم
رغم اني لا بحبه ولا بكره بس متعرفيش خبر اعدامه بعد صلاه العيد مأثر فيا اد ايه
وصحيح هو طاغية جبار ظلم وافترى لكن زي ماانتي قلتي ارحمو عزيز قوم ذل
:)
كل سنه وانت طيب
عسى ان يتوب الله عليه
رحمة الله واسعه
لكن ظلم العباد هو اصعب شيء
ربنا يجرنا من ان نظلم او نُظلم
يارب
:)
كل سنه وانت طيب
عسى ان يتوب الله عليه
رحمة الله واسعه
لكن ظلم العباد هو اصعب شيء
ربنا يجرنا من ان نظلم او نُظلم
يارب
:)
كل سنه وانت طيب
عسى ان يتوب الله عليه
رحمة الله واسعه
لكن ظلم العباد هو اصعب شيء
ربنا يجرنا من ان نظلم او نُظلم
يارب
يا غلباوى ما انا قلت ان انا لا اعرفة ولا بحبة .. انا متناقشتش فى استحقاقيتة للقتل او الحرق حتى
انا كل اللى هاممنى الاهانة . اللى انت متفق معايا على انها صعب ودة المطلوب
hi all, ma3a e7trami le 2ra2ko kolko bas whatever eli sadam 3amlo mainfa3sh yt3dm ba3d salat el3id at least ykon fih ay ra7ma , 3omamn ymkn ykon dars lel sayed el ra2is " abo gamal " ymkn yta3z we ne2oloh 3o2balk , el gamil en el sha3b nesi kol 7aga 3alshan match el zamalk vs el ahli nesio ay 7aga :( we di aktr 7aga tensihom :(:((:(:(
يا جماعه مع اني لا بفهم في السياسه الدوليه ولا حتي المحليه.. يعني بحس انها عامله زي الدوري المصري لامؤاخذه في دي الكلمه يعني يا محبي الزمالك لكن مفيش غير الاهلي اللي بيكسب و دي حاجه تغيظ والله افقدتني لذة المتابعه. المهم انا كنت بتكلم عن ايه؟ اه السياسه و اللي ماتتسمي امريك... اقصد الاهلي اللي علي طول كسبان و بسبب مين ضعف او عدم وجود ارادة و تحدي الفرق التانيه يا خوانا حد يصحي باقي الدوري بالله عليكو .. المهم انا كنت بتكلم عن ايه؟ اه السياسه والله اللي يفقع مرارتي بجد المدربين الاجانب اصلهم هم اللي عارفين يديروا القرق يتاعتنا بس.. يعني جوزيه حكم علي نادر السيد بالاعدام لما مخلهوش يلعب.. هو مش ده اللي حصل برضه من امريك... اقصد الاهلي؟؟ ولا انتو بتتكملوا علي ايه؟؟المهم انا كنت بتكلم عن ايه؟ اه تتمسوا علي خير بقي
@ darsh
7ad ysa7i el ragel dah :D
هههههه
وحياة ربنا بحب التفاؤل اللى انت فية . مش انا اللى متفائلة وانا محبطة .. دة انت اللى علمتنى التفاؤل يا فندم .. بس بالله عليك بلاش سيرة امريك... قصدى الاهلى , علشان ميقعدوناش فى جوانتنامو قصدى على دكة الاحتياطى .. انا كنت عايزة اقولك حاجة مهمة اوووووى
تضرب معايا بردقوش يا درش ؟؟
Post a Comment