اتعلم علم اللوع ... حصريا مع مريم

علم اللوع اضخم كتاب فى الارض
بس اللى يغلط فية يجيبة ارض
أما الصراحة فامرها ساهل
لكن لا تجلب مال ولا تصون عرض
عجبى !!! حبيبى يا صلاح والله

من كام يوم كان عندى مشكلة مع (....) اللهم احفظنا بلاش اقول لتتخضوا منى بس انا مش خطرة اوى يعنى

ونظرا لانى فى احدى الحركات المعارضة فالعين عليا زى الصقر ... بيحبونى ونظرا لانى مسلمة - ازهرية - محجبة - اهلاوية وبكل فخر مصرية ... ودول طبعا قليلين فى البلد زى ما انتو عارفين... فالعين عليا . مش هتجوز يعنى . لا بس عليا بطريقة ما تودى فى الكازوزا المهم يا شباب المستقبل ...

سألت اخ زميل عزيز فى هذا المجال ..لاداعى لذكر اسمة النت متراقب الحل يبقى اية مع الناس دول بصفتى احتمال الدور يجى عليا طبعا الاخ الفاضل

قالى : بصى يا بنتى انتى بنت وبلاش بهدلة .. اسهل حاجة لما تروحى ( وده على اعتبار انى هاروح بمزاجى مش هتسحل على هناك) ابقى البسى لبس روش وكدة ولو عرفتى تقلعى الحجاب يبقى خييير وهرجى بقة واضحكى ويا سلام لو حسستيهم ان انتى بقة اية بت كدة متدلعة ... ومتعرفيش من رئيس الجمهورية من كتر جهلك
قلتلة : كمل كمل ما انا اصلى رايحة اعمل فيديو كليب
قالى : والاهم تخلى بالك فى سؤال بيتسأل وردك هيبقى علية عامل كبير فى الحكم عليكى.. هيسألوكى اية حكم تارك الصلاة عمدا .. او جحودا
قلتلة : كافر طبعا .. محتاجة فكاكة يعنى يا فالح
قالى : غبية لاااااااا طبعا
قلتلة : والله يا عم هما قالولنا كدة فى المدرسة فى كتاب الفقة بتاع اعدادى ... انت مش فاكرة ؟؟
قالى : لا يا مااما انسى اللى اتعلمتية خالص .. الكلمة دية توديكى فى داهية قولى مكروة .. قولى غير مستحب
قلتلة : ما اقول ربنا يقدرة كمان وكمان والله بيتعب
قالى : انا مش بهرج
قلتله : ازور فى حكم ربنا يا ابنى انت اتهبلت
قالى : لا يا اختى البسى تهمة علشان تتبسطى
قلتلة : والحل؟؟
قالى : يا تتعلمى اللوع واللف والدوران ... يا تهاجرى .. انتى فى مصر يا حاجة ولا ناسية

وطبعا واساسى حاولت ارسم ابتسامة اللى مش مستغرب وقللتلة وبكل مرح كانى مثلا بظبط لرحلة خلويه

انا : بيس يا مان قشطة ومالة لما ازور جت عليا ما الكل بيزور .. وبعدين دة حكم واحد يلا مبروكة علينا جهنم، ضحك ضحكة اللى فهم اللى فيها وللاسف مش عارف يتصرف وقالى : يلا ربنا يوفقك فى مشوارك طمنينا بقة .. دة على اعتبار انى رايحة احارب او اجاهد فى سبيل الله .. مش هازور فى احكام الله

روحت البيت بعد سطرين النقاش اللى ممكن تفتكروهم سهلين دول ... بفكر فى كل كلمة اتقالتلى وبقول . ما الكل بيلاوع .. فى الجامعة فى الشغل فى البيت تدخل المحاضرة .. تقول الدكتور معلش اتاخرت الطريق والزحمة وحوارات ويعمر بيتك وينور سكتك وانت اصلا ... من جواك عمال تسب وتلعن وتقولة الله يحرقك محدش بقى دكتور غيرك ... لو عايز فلوس من باباك تفضل تتمحلس ويا بابا ويا حبيبى وانت من جوة بتقولة خلص يا بابا بدل ما اقلب الشريط ... كل يوم نفاق ولوع وكدب .. يا تلاوع يا تروح فى داهية .. اصل هيا بقت كدة يا مان والله

بقت كلمة صديقى العزيز اللى قالى ( انتى فى مصر يا ماما ولا نسيتى ) صدى صوت متكرر فى ودانى زى افلام الشر الابيض واسود لما كانت الكلمة تقعد تتكرر لحد ما تحس ان الشريط بتاع البطل سف او ودانك علقت

طبعا لا يخفى عليكو انى لا هلاوع ولا هاكدب مهما كان السبب ولا هخاف من العواقب .. بس الحمد لله محدش طلبنى ومجراليش حاجة

(علشان ما نعلى ونعلى ونعلى .. لازم نطاطى نطاطى نطاطى )

علشان كدة هافضل طول عمرى قصيرة ... حد يقولى بتطاطو ولا بتعملو اية بالظبط