أهلا ومرحبا بكم فى عالم مريم المثالى

من زمان وانا بحلم بالمجتمع المثالى , المدينة الفاضلة, بجد نفسى اعيش جو الناس هادية اللى بتحب بعض وتخاف على بعض وتحس ببعض أنا نفسى دة يا جماعة يحصل فى مصر.. بحلم اه بحلم. لية لا؟؟ لية محلمش؟؟. مش هيتحقق . اه عارفة بس لية محلمش علشان متنقطش؟؟.لية مخرجش اللى جوايا علشان ميجيليش كبت؟؟. عارفة ان فيكم حد هيقولى يا مريم المدينة اية اللى فاضلة ولا مجتمع اية اللى مثالى فكك من الحوارات دية انتى نسيتى اننا بتوع صفر المونديال.. هاقولكو ما انا عارفة ومش ناسية الخيبة القوية دية بس احلمو بردو.. مش هنموت لو حلمنا لكن هنموت لو موتنا حلمنا جوانا نرجع للمجتمع المثالى والله هيبقى تحفة بصوا للغرب ولاوروبا والدول المتقدمة.؟ شايفين اية .. تيجو نعمل مقارنة ونشوف بعد اد اية نوصل للمجتمع المثالى .. تعاااااااااالوا

أدى معاد لواحد فى مصر فى اى مكان وأنتظر انة يشرف .. أساسى هيلطعك ما لايقل عن نص ساعة ويا سبحان الله اساسى هتبقى الحجة المواصلات , شوف نفس الموقف برة فى أى بلد اوروبى .. عندهم احترام المواعيد من احترام الذات

أنزل الصبح وشوف وشوش الناس عاملة ازاى حاجة تموع النفس على الصبح ... تقريبا والله اعلم بيبقى ضارب فى وشهم لغم ...ميعرفوش حتى يبتسموا مع ان تبسمك فى وجة اخيك صدقة , واللى يغيظك يا اخى تطلع الميكروباص من دول مبتسم انت ومتفائل كدة وتقول,,سلام عليكم ,, متلاقيش حد اصلا عبرك ولا رد السلام وقعدو يبصولك بامتعاض على اساس يعنى انت اهبل مبتسم لية كدة حد قالك نكتة؟؟ تضطر يا ترد على نفسك يا تنفض لنفسك فى الحالتين هتخدم نفسك....يشوف بقة برة.. الراعى الرسمى عندهم الابتسامة . تلاقى الواحدة هنا ضاربة وشها الوان الطيف علشان تحلو وضاربة بوز اعوذ بالله . مع انها لو ابتسمت هيبقى الطف كتير ,للشكل جمال لا يبقى وجمال الروح هو الابقى

الشغل عندنا هنا مصدر لكسب المال ... حاجة ياعم اكل منها عيش... نقعد بقة نرغى من تليفونات الشغل واهو مال سايب .. نحل الكلمات المتقاطعة.. نسبل لزملاءنا وزميلاتنا.. تنزل الموظفة من دول بعد 24 سنة زواق على سنجة 10 وحاجة يعنى تفقع المرارة وتقعد ماسكة مشط ومرايا ... الحق يتقال شايفين شغلهم وكلهم حافظين نفس النشيد,,,فوت علينا بكرة الورق مخلصش , فى اى بلد تانى بقة الناس عندها الشغل شغل والدلع دلع ...الصبح لبس الشغل عملى تلاقى البنات زى القمر فى الجينز واللبس العملى شيك عليهم .. وبليل للحفلات.. وقت الشغل محدش بيعرف ابوة ولا بيبقى فاضى يسبل لزميلتة ... بليل مبيرحمش اه لكن الصبح لااااااافى حاجة اسمها شغل

احنا هنا بنقلد بهبل نلاقى البنت لابسة جينز ولا باجى فى فرح مثلا ال يعنى البت روشة ... والصبح بقة الحااجات اللى بتلمع وبترتر حاجة بلدى كدة تقرف . والاحذية اللى تحسسك ان انت فى الاسكيمو فى عز الحر موضة .... والولد اللى يبقى لابس البنطلون لو مد شوية يقع منة ... بردو موضة .. قلدتو بقة الغرب فى اية غير فى الهبل ؟؟ وياريت بنقلدهم صح الا للاسف بنلبس الصبح اللى بيلمع واللى بيبرق وبليل نقضيها كاو بوى اااااااااه يا بلد اااااااااااه دنياوغيرة وغيرة ....وغيرة

انما السؤال لييييييية؟ لية احنا كدة مع ان دية تعاليم اسلامنا احنا...لية منتصدقش باقل اللى نملكة ... الابتسامة.... لية بنكشر فى وش بعض؟؟ لية مش بنطيق لبعض كلمة؟؟.عارفين لما حد يخبطنى فى الشارع ببقى بلف وفى عينى شرار وخلاص عزمت على انى اقتلة ...بمجرد ما الف الاقية بيقولى انا اسف او اسفة بحس ان جردل مية ساقعة اتدلق عليا وملاقيش رد غير انى بكل ابتسامة عريضة وهدوء اقولة ,,,ولا يهمك,,, كلمة واحدة يا جماعة فى الموقف دة حلت المشكلة 3 حروف ا س ف بس هما دول تاخد بيهم حسنات وكمان تمتص غضب اللى قدامكجزاك الله خير_ما شالله جميل لبسك_بعد ازنك عدينى _ لو سمحت ممكن اعدى_ ولا يهمك محصلش حاجة الله يبارك فيك_ ربنا يعزك _ الله يكرمك ياااااااااااه الله جميلة اوى الكلمات دية نفسى افضل اسمعهم على طول لو نبطل نلبس على الموضة وكل واحد لبس اللى يليق علية وعلى مجتمعة الشرقى وبلدة ونشأتة الموضوع هيفرق .... لو كل واحد قال ما الكل بيعمل كدة هتبقى كارثة ... انا خايفة يا جماعة انتقام ربنا منا اصل بصوا للى بيجرى فى البلد وانت احكموا انا سايبة لكم مطلق الحرية

لو دة حصل هنبقى وصلنا للعالم المثالى اللى بتكلم عنة .... تفتكرو ممكن نوصلة بعد كام قرن كدة؟؟المحبطة : مــــريـــــم