أوقات كتير ضيعتهم على ناس كتير عرفتهم
بس العبث انى خلاص معرفهمش دلوقتى
وحاجات كتير فهمتهم... لو قلتهم
هيبقى تضيع للشوية الصغنتتين اللى فاضلين من وقتى
قريت الكلمتين دول فى الدستور من هنا .. وحسيت انى سافرت وسرحت كدة وبصيت للسقف زى ما يكون هيغششنى مثلا
بس مبصتش على السقف وسرحانة علشان فى حالة حب لا سمح الله وبستمد من السقف العون زى افلام زمان
بصيت علشان اعد كام مرة عرفت ناس وسبتهم ؟؟
كام مرة عرفت حد وحبيتة وفى الاخر دلوقتى معرفش حتى ساكن فين ؟؟
كام مرة كان ليا صحاب حلوين اوى وسيبنا بعض ؟؟ سيبنا بعض مش علشان هما مش كويسين ولا علشان انا غبية
وبكرة صحابى او باكلهم زى مليجى اخو اوشه لا علشان هيا دية الحياة
كام حاجة فهمتها وصدمتنى ؟
وكام حاجة ندمت انى فهمتها وكان نفسى ابقى عبيطة ؟
فضلت سرحانة كتير بفكر فى وقت ضيعتة ومحستش بية .. وفرص راحت منى مش عارفة اعوضها
فقت على صوت الحاج مدحت صالح الله يكرمة زى ما يكون كان متسلط عليا مثلا ومعرفش مين المؤذى اللى شغلة
واكيد حد من المجاريح جيرانى .. اصلنا شارع رومانسى وعاطفى شوية
اهو مدحت بية باشا صالح كان بيقول بقة اية
اقفل على قلبك كفايا تجرحة
وتعلقة بحبال امانى تطوحة
من النهاردة الحلم مش هيفرحة
ارجووووووووووك متحلمشى
كنت هاصوت ساعتها واقول ارجوووووووووووكم اقفلو الكاسيت .. وفجأة لقيت نفسى بسرح تانى وبنتقل لمكان تانى بالذاكرة
بفكر وبقول .. ياترى كام مرة حلمت ولما حلمت حققت ولا لا ؟؟
رجعت بالذاكرة 15 سنة لورا .. لما دخلت المدرسة كنت طفلة فى منتهى الرخامة .. عندية جدا وعصبية جدا وشقية جدا
بس كنت ذكية ودمى خفيف والفترة دية مكانش ليا احلام علشان كنت بحقق كل اللى نفسى فية قبل ما احلمة
ولما كبرت وبقيت فى الابتدائية حلمت ادخل كلية هندسة ومش اى قسم لا مدنى كمان واتصدمت باول حقيقة وهيا ان مفيش هندسة
بنات فى الازهر .. المهم دخلت علمى وذاكرت وجبت اللهم لا ار ولا حسد 95 % فى الثانوية الازهرية وكانت وقتها الهندسة فتحت
للبنات .. بس للحظ السعيد خدت من 95.2 % دة بمناسبة انى فقر حبتين ودخلت ترجمة فورية رغم انى مبحبهاش الا انى تقبلتها
وهيا بمثابة الكابوس .. حاولت احولة لحلم جميل .. وبردو لحد دلوقتى معرفتش
ابتداء من 3 ثانوى بدأت افهم واحس يعنى اية حلم .. ويعنى اية ميتحققش ؟ ويعنى اية انك تصحى من حلمك على كابوس
وسالت نفسى سؤال مهم اوووى ... هو انا كنت بحلم علشان احقق الحلم ولا علشان اهرب من الواقع ؟؟
ملقتش اجابة غير انى ابص حواليا اقرأ اى حاجة علشان اخرج من موود السرحان بقة وشغل الحبيبة اللى يشل دة .. المهم بصيت جنبى لقيت كشكول محاضرات .. قلت اهو الفرج جة اهو .. اذاكرلى كلمتين
بفتح لقيت فى اول صفحة عمنا صلاح جاهين .. وزى ما يكون اتفق مع الحاج مدحت صالح والمعلم خالد كساب بتاع الدستور علشان
يعملولى احلى امسية نكد عشتها فى تاريخ حياتى ... وفجأة ومن غير اى مقدمات لقيت كلام صلاح جاهين بخطى فى كشكولى بيقول
ياما صادفت ناس ومصاحبتهمش
وكاسات خمور وشراب ومشربتهمش
اندم على الفرص اللى سبتهم ولا اللى مسبتهمش
الله الله الله .. دخلنى عم جاهيين على منطقة تالتة خالص وسرحت فيها .. وكل مرة بسرح بيكون البطل هو السقف .. انا الحاجة المشتركة
انا والسقف بنتكرر مع كل سرحة من السرحات اللى بسرحهم
المرة دية بقة مفكرتش فى كاسات الخمور والشراب ولا الكابتشينو علشان مبحبوش ولا الحاجات دية كلها
لا .. فكرت فى حياتى كمجمل .. فى اية اندم علية ؟؟ وفى اية مندمش علية
طيب لو ندمت اندم لية ؟؟ ولو مندمتش ابقى مبحسش ولا اية ؟ ولو فكرت ابقى بتعب نفسى ولو كبرت ابقى سلبية وبضيع نفسى
طيب هو انا عايزة اية ؟؟ ومش عايزة حاجة لية ؟؟
صلاح جاهين عايز منى اية .. والجيران فتحوا الاغنية دية لية ؟؟ وياترى اللى فاتحها فاتحها علشان بتلمس جواة حاجة
ولا فاتحها نوع من انواع الغلاسة او انة عايز يسمع فيرجينيا جارتة اللى بيحبها انة بيسمع اغانى وواد كوول
وخالد كساب هو كمان كتب كدة فى المقال لية ؟؟ مش عارف ان فى ناس معقدين دماغهم مبتسكتش هيقروا الدستور
انا اية اللى خلانى اشترى الدستور؟؟ اية الى خلانى اعرف الجيران اساسا
واية اللى خلانى افتح كشكول المحاضرات .. او اية الى خلانى اكتب الرباعية دية فية زمان
وعلشان اخرج من كل الاوهام دية كلها .. وعلشان اريح دماغى اللى تعبت من التفكير قررت ان دية تكون اخر طلعة سرحان اسرحها اليوم دة ففكرت فى حل هايل
قمت طفيت النور .. ونممممممممت
ومعرفش انا نمت علشان احلم .. ولا علشان اهرب من الحلم .. ولا لية بالظبط
بس الحمد لله صحيت فاكرة كل كلمة وعلى غير العادة .. فقررت اسجل اللحظة دية علشان مش هنساها
